Wilhelm Matthias Naeff

De Wilhelm Matthias Naeff (* 19. Februar 1802 z Altschtätte, SG; † 21. Januar 1881 z Muri bi Bärn) isch en Schwiizer Politiker (FDP) gsii.

De Naeff isch in ere altiigsessene Rhytaler Familie ufgwachse. Bereits siin Vater isch e politisch iiflussriiche Chaufmaa gsii. Er hät Recht z Heidelberg gschtudiert und nach siinere Rückchehr i d Schwiiz isch er bald i d St. Galler Kantonsregierig gwählt worde. De Naeff selber hät nöd i d Usenandersetzige zwüsched de Liberale und Konservative iigriffe, wo damals d Schwiiz beherrscht händ. S Rhytal isch e Hochburg vo de Liberale gsii und so hät sich de Naeff chönne uf siini Aahängerschaft verlaa.

De Naeff hät zu dr Sibnergruppe ghört, wo d Bundesverfassig vo 1848 usgschaffet händ und isch dänn am 16. November 1848 in Bundesrat gwählt worde. Dem hät er während 27 Jahr aaghört, wesentlich länger als siini damalige Amtskollege.

De Naeff hät i siinere langduurende Amtsziit meeh und meeh a Iifluss verlore und a ihm hät dr Ruef vom ene Langwiiler ghaftet. Verschideni Beschtätigungswahle hät er nur mit knappe Mehrheite überschtande. Am 31. Dezember 1875 isch er schliesslich zruggträte.

Während siinere Amtsziit isch de Wilhelm Matthias Naeff de folgende Departement vorgschtande:

• 1848–1852: Poscht- und Baudepartement
• 1853: Politischs Departement
• 1854: Handels- und Zolldepartement
• 1855–1859: Poscht- und Baudepartement
• 1860–1866: Poschtdepartement
• 1867–1872: Handels- und Zolldepartement
• 1873: Finanz- und Zolldepartement
• 1873: Iisebahn- und Handelsdepartement
• 1874–1875: Finanz- und Zolldepartement

Er isch Bundespräsident gsii im Jahr 1853 und Vizepräsident im Jahr 1852.